The Quest for a Clam Known as KAGGO (The Tupanna Adventure 2)

Rolling in the River (The Tupanna Adventure 1)

SAKANTO LA MANEN AGPAKITA ITI MAYO

(courtesy of Google)

Malagipmo pay kadi daydi naudi?
Inay-ayonak kadayta banglom
Dimmanonka ket indiayaannak
Iti kappuros a sabsabong
Binussognak kadagiti agkakaimas a sapatam
Binarteknak iti kasla diro nga isemmo
Pinarmekmo amin a panagduaduak
A nangkullaap iti amin-amin kaniak…

Dinak ininggaan
Agingga nga intalekko kenka ti masakbayak
Nasangal dagiti babassit nga arapaap
Ta pinampandagak ti karim a salaknibannak
Ken yaonnak iti nakailumlomak a rigat
Ngem kasla asuk a nagpukawka
Maysaka met gayam a bulbullagaw
A sa la agbisti maminsan iti tunggal tallo a Mayo…

Ket ita, agpadlawka manen
Apoka nga apo iti arsadanan ti agdan
Kayatmo a luktak ti ruangan, paulienka
Tapno baliwannak a digaan
Ngem iti likudan dayta maskaram, ammok
Umaynak laeng ulawen a kasla birabid
Inton magun-odmo manen ti tung-edko
Sakanto la manen agpakita iti Mayo.

--Derick Marcel F. Yabes
(Naipablaak iti Bannawag idi Mayo 10, 2010)

SUMAN-LATIK

Kasla siak 'tay suman nga awanan sam-it
Ket sika met 'tay napalet a latik...

Warwarem man ketdi daytoy bungonko
Ket digosennak kadayta nanam ken sam-itmo...

--dmfyabes2012

Madre Sanchez Mira: Dua a Kalikagum

1.
Lagaek koma man a kasla silag
Dagiti lumtuad a binatog
Ti daniw ditoy barukong
A pagiladam a mangbuybuya
Kadagiti aglanglangoy nga ulep
Batokbatoken ti bulan—
Makilinlinnemmengan
Kadagita kabus a matam
Idinto nga agkulkulalanti dagiti bituen
A mangkidmakidmat iti pakabuklam.

2.
Siak koma ‘tay pul-oy a mangyapros
Samiweng ti nakaparsuaan
Iti lengnges, iti puon dagita lapayag
Agay-ayamak kadagiti linabag ‘ta buok
Ken muldot…
Agkarayamak nga umuli kadagiti bantay
Agdakiwasak iti pantok sa wanawanak
Ti kasla awan patinggana a tanap—
Agingga nga aguyasak
Iti awis ti bang-i ti kataltalonan.

--DERICK MARCEL F. YABES
Sanchez Mira, Cagayan


(Naipablaak iti Bannawag, Hulio 23, 2012 a bilang.)

RELATED LINK: daniw ken samiweng